Titolo: INTRODUÇÃO FILOSOFIA POLÍTICA BA TIMOR LESTE: Husi Tempo Classico – Moderno
Autor: Elidio Agusto Guterres
Introdução: Prof.Dr.Frans Magnis Suseno,SJ
Lay out: Tollelegi
Tinan : 2024
Página : 206
14×21 cm
ISBN:
Nanal no ibun la soi atu hato’o sentimento haksolok no agradece ba Maromak, na’in ba matenek. Obrigado no agradece mak bele hato’o hosi fuan ba graça matenek nian nebé Na’i hasulin ba hakerek na’in hodi realiza obra simples no ki’ik ida neé. Obra simples no ki’ik ida ne’e mosu iha ita le’et hanesan resposta ida ba necesidade estudante universitarios sira iha Timor nebé estuda política liu-liu filosofia política. Hanesan ita hotu hatene katak, iha Timor Leste, universidade sira menus livro/referência ho dalen tetun. Maioria referência ho dalen Portugues, mesmo la completo.
Durante hakerek na’in nia jornada hanesan docente, estudante barak mak informalmente hateten katak susar tebes ba sira atu compreende saida mak sira le’e no estuda hosi livro sira ho dalen portugues. Problema ida ne’e acontece tanba maioria la compreende ho di’ak no loos dalen portuguesa ne’e rasik. Wainhira haré preocupação hirak ne’e ho kle’an no honesto, preocupação ida ne’e sério no iha impacto negativo nebé boot tebes ba qualidade educação iha Timor-Leste. Ema balun bele la concorda, maibé bainhira ita haré realidade ida ne’e ho critico, kle’an, no justo, língua sai problema principal oinsá hasa’e qualidade educação iha Timor-Leste.
Baseia ba experiência simples ida ne’e, hakerek na’in koko hatan preocupação hirak ne’e liu hosi dalan hakerek livro simples no ki’ik ida ne’e ho dalen original no oficial Timor-Leste nian, dalen Tetun. Espera, obra ki’ik ida ne’e bele ajuda estudante sira bele compreende ho di’ak saida mak sira estuda no le’e kona-ba política no Filosofia política rasik. Alem de estudantes nebé estuda filosofia, políticos, na’i ulun, ativistas, no sociedade em geral, bele asseso ba obra ki’ik ida ne’e. Filosofia política ne’e hanesan ciência ida hosi Filosofia nebé importante tebes. Filosofia política ajuda ita haré realidade social no política ho critico, kle’an, loos no di’ak.
Livro Introdução Filosofia política ba Timor-Leste, hanesan obra dahuluk kona-ba Filosofia Política ho dalen Tetun. Livro ida ne’e hanesan introdução ida ba leitores sira hodi bele hatene linha geral sira kona-ba saida mak filosofia política, liu-liu kona-ba ideia sira hosi filósofo sira. Tanba ne’e, iha livro ida ne’e, hakerek na’in sei apresenta saida mak filosofia, filosofia política, no sei hatuur idea hosi filósofo sira kona-ba nação, poder, nst, hosi tempo clássico to tempo moderno.
Hakerek na’in hakarak hato’o agradecimento ba Pe. Justino Tanec, Ms.Teo, nebé ho nia maneira suporta no apoio atan ha’u hodi hakerek livro ida ne’e. Agradeçe mós ba estudantes Faculdade Filosofia Instituto Superior de Filosofia e de Teologia (ISFIT) nebé sempre halo dialética kona-ba problema social no política iha Timor-Leste hodi hakroat hanoin sira kona-ba filosofia política. Obrigado mós ba alin Cirilo nebé haré ortografia texto livro ida ne’e ho nia matenek no pacênçia. Agradeçe no obrigado barak ba Prof. Dr. Frans Magnis Suseno, SJ, nebé halo introdução ba livro ida ne’e no fo ideia construtivo kona-ba filosofia política. Ikus liu, obrigado ba Instituto Superior de Filosofia e de Teologia (ISFIT) nebé suporta hakerek na’in imprimi livro simples ida ne’e. Espera katak, obra ki’ik ida ne’e bele contribui ba construção educação iha Timor-Leste.
